Heb 5 | MMX | STEP | Lavamaasa amgomgo axap Moroa i soxolik ka di xantubu at limixin kusu dina ru katling di at lugugu at ne Moroa. Dim taba leventamtaba ri tong loklox avukat ti ne Moroa la diplavang bok mi levempanga mi lavanuet kangkedek ti laxakapmek at limixin.

Hebrews 5

1 Lavamaasa amgomgo axap Moroa i soxolik ka di xantubu at limixin kusu dina ru katling di at lugugu at ne Moroa. Dim taba leventamtaba ri tong loklox avukat ti ne Moroa la diplavang bok mi levempanga mi lavanuet kangkedek ti laxakapmek at limixin. 2 Lamaasa gomgo im suma leveloklok tong pen, kuren la i epovo do ni na suma rooro nedi di lok laxakapmek mila kopmen dinaklen i do mo levempanga i lok kapmek. 3 Ni lavasuun teren la lamaasa gomgo naba lok laplavang mi levempanga ri laxakapmek axa ren, la ri laxakapmek bok at limixin.

4 Kopmen na epovo do tara na lok ka mo lugugu mi lavavara mun teren, ketla ne Moroa xa naba soxolik ka i ngan neni ga soxolik ka ne Aron. 5 La ne Karisito bok kopmen goxo xip ka mo lugugu silok at lamaasa gomgo mi lavavara ren. Ketla ne Moroa ga lok tin keretna,

“Nenu ne Nuruk, ningina nenia a lok ngan ne Tamam.” ^a

6 La at loxot petpes at Lovoang Kaala Moroa ga lok bok tin keretna,

“Nenu Lamaasa Avolo ngan ne Melkisedek, la kopmen taxavaxap at lugugu ram.” ^b

7 Ap mo levenaleng ne Iesu ga rooro ren at na lavatbung menemen, neni ga sing eburu mi lerengteng silok ti ne Moroa do na lox arooro i basinge lanmet, la ne Moroa ga sepo lisingising teren la ga lox alolos i mila neni ga lox asi i maxopok at lavavara at ne Moroa. 8 I ruturun do neni ne Nitna ne Moroa, ketla mo losongsongot neni gap kiv i, ga lox epovo i xusu na mu asu lavavara at ne Temen. 9 Kerepmo la ne Moroa ga lox agagas li i, la neni ga ravasu ngan ta lavasuun at lorooro avolo rinedi ding tonga res teren, 10 la ne Moroa ga lok li i ngan Lamaasa Avolo ngan ne Melkisedek.

Nemen Mita Subu Kot Kantubu

11 Ma ruuna laxalinga solo mumu ne Iesu ngan Lamaasa Avolo, ketla naba lolos ti mus na levelinga rinimi mila lodoxoma atnimi kopmen na gagas ti lok ka na levenanasa. 12 At na levenaleng i epovo do mina lok ka lugugu ri anasa limixin mi levelinga at ne Moroa; ketla kopmen mina epovo mila move mik pakes kusu tara na lox ase amu manga nimi mi levenanasa avot at levelinga at ne Moroa. I lok ngan ta do nemi move mi lok ngan lubung kadede, di tus at luvutnen di; kovisi mina epovo kusu mina anan leveluxa lolos. 13 Lara do i rooro mi ladan tus at nenen, i ngan laxadede; i lok ngan ta do nemi xovisi mina ven kibis levempanga i lox avukat la levempanga i lok kapmek. 14 Ketla tinedi dira mukun pam at lunuunu atdi, di epovo dina ven kibis levempanga i lox avukat la levempanga i lok kapmek, mila dik lok kaka amisik levelinga at ne Moroa.